Во мноштвото културни, музички и забавни настани што се одржуваат низ Македонија во завршницата на летото, еве уште еден настан кој доаѓа во Скопје и носи поинаква комбинација од вкусна храна, музика и добра атмосфера.

Од 4 до 8 септември, во паркот „Авионче“ во скопската општина Аеродром ќе се одржи второто издание на „Аеро стрит фуд фестивал“, петдневна манифестација која и годинава ќе ги собере љубителите на уличната храна, музиката и забавата.

Посетителите ќе можат да уживаат во разновидна понуда на улична храна, но и во богата музичка програма составена од настапи во живо и диџеј-сетови. Фестивалската програма секоја вечер започнува во 17:30 часот и ќе трае до 00:30 часот.

Првата фестивалска вечер, на 4 септември, ќе биде резервирана за Милан Серафимов, „The Ringtones“ и Александар Јорданов. На 5 септември следуваат Јанко Петел Јаваше, „De Marble“ и Марко.

На 6 септември публиката ќе може да ги проследи настапите на Васо, „Допамин“ и Ризински, додека на 7 септември музичката програма продолжува со Tei Arona (Fluere), „Southpark“ и DJ Vecky (Fluere).

Големото финале е закажано за 8 септември, кога „Acoustic Division“ ќе приреди специјален музички омаж на Владо Јаневски, а „Shure Shots DJs“ ќе настапат со музичка посвета на „ДНК“.

Во текот на фестивалот ќе има и настапи на повеќе диџеи, меѓу кои DJ Gimbo и Фичо, со што музичката програма ќе понуди различни жанрови и атмосфери во текот на петте вечери.

Покрај музиката, во фокусот останува и уличната храна, па „Аеро стрит фуд фестивал“ е замислен како место каде што посетителите ќе можат да пробаат различни специјалитети, да се дружат и да уживаат во вечерите под отворено небо.

Реклама

Со богата понуда на храна, музика во живо, диџеј-сетови и забавни содржини, второто издание на „Аеро стрит фуд фестивал“ најавува пет фестивалски вечери во скопски Аеродром, како уште еден настан со кој ќе се заокружи летната сезона.

Реклама