Шоу Биз
Кавадарци во знакот на виното и традицијата – „Тиквешки гроздобер“ од 4 до 6 септември
Кавадарци од 4 до 6 септември повторно ќе живее во духот на виното, традицијата, музиката и добрата забава. На денешната прес-конференција, одржана во Винскиот музеј, официјално беше претставена програмата за годинешното издание на традиционалната манифестација „Тиквешки гроздобер 2026“, еден од најпрепознатливите настани во градот и Тиквешкиот регион.
Во текот на трите фестивалски денови, Кавадарци ќе понуди богата културно-уметничка и музичка програма, вински дегустации, традиционални содржини и забава за сите генерации. Главните случувања ќе се одвиваат на Градскиот плоштад и во Паркот на револуцијата, но дел од програмата ќе се реализира и на улицата „Илинденска“, како и во музејските и галериските простори.
Организацијата и реализацијата на културните содржини годинава ѝ се делегирани на компанијата „Иноватива груп“ ДОО Скопје, а како што беше истакнато на прес-конференцијата, посетителите ги очекува атрактивна музичка програма со познати домашни и странски имиња, но и со значајно присуство на локалните музички артисти.
Првата фестивалска вечер, во петок на 4 септември, ќе започне со традиционалната гроздоберска трпеза на улицата „Илинденска“, како и со традиционалниот турнир „Сестри Китеви“. Во текот на денот ќе има и промоција на монографијата по повод 50 години од постоењето на Музеј-галеријата. Вечерната програма ќе продолжи во Паркот на револуцијата со настапот на Еснаф, по што следуваат Трио Мањифико. Забавата на Градскиот плоштад ќе ја продолжат Zee Bond, Dejto и DJ Galoski.
Саботата, 5 септември, ќе донесе уште побогата програма. Покрај таблијадата, мото-релито и „Тајната дегустација на вино“ во Паркот на револуцијата, посетителите ќе можат да уживаат во настапите на Трио Мерак, а во вечерните часови ќе се одржи традиционалниот тиквешки карневал, кој ќе ги поврзе улицата „Илинденска“ и Градскиот плоштад.
На главната сцена во сабота ќе настапат Нокаут, Дупер и Жељко Самарџиќ, со што се очекува Градскиот плоштад да биде исполнет до последното место.
Последниот фестивалски ден, недела 6 септември, ќе започне со изложба на олдтајмери на улицата „Илинденска“, а програмата ќе продолжи со Акустико лајт и Трио Гранде во Паркоt на револуцијата. На улиците ќе се одржи и детскиот тиквешки карневал, додека во Музеј-галеријата ќе биде отворена изложба на кавадаречки уметници.
Вечерта на Градскиот плоштад ќе настапат Слободанка Танева и Мирјана Митрева, Џејла Рамовиќ и Пеџа Јовановиќ, со што ќе биде заокружено годинешното издание на манифестацијата.
„Тиквешки гроздобер“ и годинава ги обединува љубителите на виното, традицијата, музиката и локалната култура, претворајќи го Кавадарци во центар на празничната атмосфера во срцето на Тиквешијата. Манифестацијата, покрај забавниот карактер, има и значајна улога во промоцијата на винската традиција и туристичкиот потенцијал на регионот, кој со векови е препознатлив по производството на едно од најпознатите македонски вина.
Шоу Биз
Македонска песна во холивудски филм – „На Струга дуќан да имам“ стаса до Холивуд
Македонската традиционална музика добива уште едно интересно место на светската филмска сцена. Една од песните што со децении е дел од македонското музичко наследство – „На Струга дуќан да имам“ – се слуша во американскиот филм „The Rivals of Amziah King“, во кој главните улоги ги толкуваат познатите актери Метју Меконахи и Курт Расел.
Станува збор за американски неовестерн трилер во режија на Ендру Патерсон, а токму изборот на македонската песна му дава специфичен музички печат на дел од филмот. Иако приказната и музичкиот концепт се силно поврзани со американската блуграс и рутс традиција, во филмот се појавува звук кој доаѓа од сосема поинаков музички простор.
Верзијата на „На Струга дуќан да имам“ која е употребена во филмот е аранжирана од Етел Рејм, а ја изведува Женскиот вокален ансамбл „Китка“ од Оукленд, Калифорнија, заедно со Шира Камен и Питер Маунд. Ансамблот е посветен на источноевропските женски вокални традиции, што дополнително го објаснува начинот на кој македонската песна е вклопена во музичкиот амбиент на филмот.
Особено впечатлив е начинот на кој традиционалната мелодија функционира во филмскиот контекст. Нејзините вокални хармонии и карактеристичниот 7/8 ритам носат препознатлива динамика, но и чувство на движење и напнатост, создавајќи атмосфера која се разликува од доминантниот американски музички израз во филмот.
„На Струга дуќан да имам“ е песна која во македонската традиција одамна ги надминала границите на едно место или една генерација. Во нејзината основа е љубовната приказна, разиграна и ведра, но со силна емотивна порака. Стихот „срцево ми го изгоре“ ја носи страста и копнежот на момчето кое ја очекува својата сакана да помине покрај него.
Најпознатата верзија е поврзана со Струга, но песната низ времето добила и други локални варијанти, во кои се споменуваат различни македонски градови и маала.
Фактот што токму ваква песна нашла свое место во американска филмска продукција е уште еден пример како традиционалниот македонски музички израз може да најде пат до публика далеку надвор од Балканот.
Филмот „The Rivals of Amziah King“ од 14 август се прикажува во американските кина, а македонската песна во неговиот саундтрак веќе привлече внимание и на социјалните мрежи, каде што е споделена и сцената во која се слуша нејзината изведба.
-
Шоу Бизпред 6 месециМала ѕвезда со голем глас – Ива Пауновиќ чекори сигурно кон музичкиот врв!
-
Народнапред 5 месециДарко Билбиловски претстави нова песна исполнета со емоција – „Само да си моја“
-
Шоу Бизпред 5 месециЗошто македонската музика „тапка во место“ и како легендите како Александар Сариевски го чуваат идентитетот
-
Шоу Бизпред 2 месециЅвездени носталгии тема – Горчлива чаша 14.07.2026
-
Шоу Бизпред 5 месеци„Позитив бенд“ – музика, еуфорија, енергија – гаранција за добра забава
-
Шоу Бизпред 4 месециКога ќе се спојат Илчо Париси и Спасе Антевски атмосферата станува спектакл!
-
Некатегоризиранопред 6 месециМладата Викторија Ефтимова го претстави новиот сингл „Идеали“
-
Шоу Бизпред 2 месециЅвездени носталгии тема – Гламур 07.07.2026