Шоу Биз

Макфест 2025 – 40 години музичка магија од Штип

Објавено

пред 11 месеци

на

октомври 12, 2025

Од

Најпознатиот македонски фестивал на забавни мелодии, „Макфест“, годинава слави голем јубилеј – 40 години од своето прво издание. Фестивалот, кој низ децении е синоним за македонската забавна музика, ќе се одржи на 23, 24 и 25 октомври во Штип, во организација поддржана од Општина Штип, на чело со градоначалникот Иван Јорданов, уметничкиот директор Роберт Саздов и продукцискиот тим предводен од Александар Арсовски.

Првото издание на „Макфест“ се одржа на 18 октомври 1986 година во Домот на културата „Ацо Шопов“ во Штип, кој до денес останува негов препознатлив симбол. Токму од оваа сцена потекнуваат многу од најголемите македонски музички имиња и хитови кои прераснаа во евергрини.

Со своето членство во ФИДОФ (Светската федерација на фестивалски организации), фестивалот доби и меѓународна афирмација, претставувајќи ја Македонија на сцените во Белорусија, Русија, Египет, Турција, Ирска, Романија, Франција и други земји.

Во времето на поранешна Југославија, „Макфест“ беше интернационален фестивал со бројни настапи на познати странски изведувачи. По осамостојувањето на Македонија, прерасна во најголем домашен музички бренд и единствен промотор на македонската музика во странство.

Во изминатите четири децении, на сцената на „Макфест“ се изведени повеќе од 1000 нови композиции. Фестивалот е познат и по својот уникатен рекорд во светски рамки – Ристо Самарџиев, деветкратен победник, е единствениот изведувач кој победил во сите категории: како соло пејач, во дует, со група и како автор на музика и текст.

Победите кои ја започнуваат историјата почнуваат од Хелена Благне, победничката на првото издание во 1986 со песната „Кога те нема“, до Александар Тодоровски со „Под исто небо“. Меѓу најпознатите победници се и Владо Јаневски („Еден бакнеж“), Дуле и Коки („Виолина и гитара“), Тамара Тодевска и Врчак („Седмо небо“), Влатко Лозановски („Времето да застане“), Александра Јанева („Врати ми го сонцето“, „За сто години“), Антониа Гиговска, Нокаут и многу други.

И во најтешките времиња, како во пандемијата со Ковид-19, фестивалот не ја прекина традицијата — се одржа на отворено, на плоштадот во Штип, покажувајќи дека музиката не познава пречки.

Јубилејното издание на „Макфест 2025“ ветува уште една незаборавна фестивалска магија. Со три вечери исполнети со нови композиции, настапи на млади и веќе докажани изведувачи, како и посебни ретроспективи во чест на фестивалските легенди, Штип повторно ќе биде епицентар на македонската забавна музика, а Макфест ќе остане дел од македонскиот музички идентитет, традиција што со љубов се негува веќе четири децении.

Поврзани теми:

Следно

Ѓоко Јовиќ и Јована Богдановска со песна што ја разбуди македонската гордост – „Како се раѓа Македонец“

Не пропуштајте

ВЕЧЕРВА ВО ТЕТОВО – ЛЕНИ ПАРТИКОВА ГО ЗАПАЛУВА „ДВЕ СРЦА“ – ЖУРКА ЗА ПАМЕТЕЊЕ СО РОБЕРТИНО И ДЕНИ!

Продолжи со читање

Шоу Биз

Босилово повторно ги собира љубителите на фолклорот – 15 години „Средба Русалии – Фолклор 2026“

Објавено

пред 2 дена

на

август 24, 2026

Од

Цаци

Во овој исклучително активен период со културни настани, Естрада.мк продолжува да ги следи културните настани низ Македонија и да ги претставува манифестациите кои ја чуваат нашата традиција, фолклор и македонскиот културен идентитет. Овојпат патот нè води во Босилово, каде на 27 август 2026 година ќе се одржи јубилејното 15-то издание на Меѓународниот фестивал „Средба Русалии – Фолклор 2026“.

Петнаесет години традиција, песна, ора и дружење со фолклорните ансамбли се доволна причина Босилово и ова лето да биде место на кое ќе се сретнат љубителите на македонското фолклорно наследство.

Фестивалската програма започнува во 18 часот со дефиле, со кое учесниците ќе продефилираат низ Босилово и ќе ја најават големата фолклорна вечер.

Во 19 часот следува свечена програма во црквата „Пресвета Богородица“, а централниот дел од фестивалот започнува во 20 часот во паркот.

Пред публиката ќе настапат повеќе фолклорни ансамбли и културно-уметнички друштва: КУД „Русалии“ од Секирник, ФА „Цветови“ од Дедино, „Центар“ од Петрич, КУД „Јане Сандански“ од Ново Село, ФА „Копачка“ од Драмче, „Атми Митко Алексoв“ од Кочани и ФА „Осоговски извор“ од Оризари.

Разновидноста на учесниците уште еднаш покажува дека фолклорот е еден од најубавите начини за поврзување на различни места, традиции и генерации. Преку песната, орото и народните носии, фестивалот ја претвора сцената во своевидна жива слика на македонското културно наследство.

Но, фестивалската вечер нема да заврши со фолклорните настапи. Од 22 часот, публиката ќе има можност да ужива во концертот на Дамјан Стојановски, кој со својот препознатлив музички израз ќе биде задолжен за продолжување на празничната атмосфера.

„Средба Русалии – Фолклор“ низ годините прерасна во значајна културна средба која ја негува традицијата и овозможува фолклорот да остане жив пред новите генерации. Токму затоа јубилејното 15-то издание е уште една потврда дека ваквите манифестации имаат огромно значење за зачувувањето на културното наследство.

Босилово на 27 август ќе биде место на кое ќе се слушне звукот на тапаните, ќе заиграат фолклорните ансамбли, ќе се облечат традиционалните носии и ќе се продолжи приказната за македонската традиција.

А Естрада.мк и понатаму ќе биде таму каде што се создаваат ваквите убави приказни, затоа што нашата култура не се чува само во книгите и музеите, таа живее во песната, орото, носијата и во луѓето кои со љубов ја пренесуваат од поколение на поколение.

Босилово ги отвора вратите за 15 години „Средба Русалии – Фолклор 2026“ – вечер посветена на традицијата, фолклорот, музиката и заедништвото.

Продолжи со читање