Историски успех за македонскиот танц! Македонската танцова репрезентација се искачи на највисокиот пиедестал на Светскиот куп на Интернационалната танцова организација (IDO), кој деновиве се одржува во спортскиот центар „Борис Трајковски“ во Скопје.

Во силна и масовна конкуренција, со врвни танчери од повеќе од 30 земји од целиот свет, македонските претставници успеаја да го освојат вниманието на меѓународното жири и да ја понесат престижната титула светски прваци.

Најголемиот успех за Македонија го донесе реномираното танцово студио „AQUA DANCE CLUB“, кое триумфираше во една од најатрактивните категории – „IDO World Productions Cup“.

Реклама

Победничката точка, инспирирана од култниот екс-ју хит „Сањао сам ноќас да те немам“, беше вистинско сценско уживање. Со совршена танцова техника, впечатлива сценографија, силна емоција и извонредна енергија, македонските танчари ја освоија салата и ја кренаа публиката на нозе.

Зад ова визуелно и кореографско дело стои младата и исклучително талентирана македонска кореографка Јана Андрејевиќ, која е комплетен автор на победничката точка.

Посебна тежина на успехот му дава фактот што златото е освоено пред домашната публика, на домашен терен, во услови кога очекувањата и притисокот биле огромни. Наместо да им биде пречка, домашната сцена очигледно им дала дополнителна енергија на македонските танчари, кои со својот настап испратија моќна порака дека македонскиот танц има што да покаже и на најголемата светска сцена.

Триумфот на „AQUA DANCE CLUB“ е уште еден голем успех за македонската танцова сцена и доказ дека зад неа стојат млади, талентирани и посветени луѓе кои со огромна работа стигнуваат до светскиот врв.

Реклама

А танцот во Скопје продолжува.

Европското првенство и Светскиот куп во следните денови носат нови натпревари, нови категории и нови предизвици, а македонските претставници ќе продолжат во борбата за нови медали.

Реклама

Но, едно злато веќе е испишано во историјата.

„AQUA DANCE CLUB“ е светски шампион, а македонското знаме денес се развеа на врвот на светската танцова сцена!

Реклама