Не мораш да бидеш личност од естрадата, за Естрада.мк да пишува за тебе. Овој пат пишуваме за личност која нема врска со сцена, естрада и музика, освен како голем љубител на музиката, посебно македонската музика и голем фан на Радио Зона М1. Овој пат пишуваме за своевиден херој кои е на браникот на државата, тогаш кога е најпотребно, најнеопходно и можеби најопасно.

Додека летните пожари беснеат низ земјата, а воздухот е исполнет со чад и напнатост, еден човек и понатаму ја облекува својата летачка униформа и седнува зад командите на противпожарниот авион, ер – трактор – иако одамна ја заслужи својата пензија. Тоа е Стоје Арсовски, ветеран-пилот и тивок херој на македонското небо.

Со децении искуство, Стоје е еден од ретките специјализирани пилоти за управување со Ер – трактор – моќни авиони што можат да наполнат и до 6.000 литри вода и да ја исфрлат директно врз пожариштата. Неговата прецизност, храброст и смиреност во најтешки моменти му донесоа длабока почит и меѓу колегите, и меѓу граѓаните, особено во критичните сезони кога животите и имотот беа под закана.

По пензионирањето, Арсовски немаше намера да се врати на активна служба. Но, реалноста на теренот – недостаток на обучени пилоти и зголемен број пожари – ја наметна потребата. Со чувство на должност и љубов кон татковината, Стоје потпиша договор за ангажман по потреба, со што останува достапен да помогне секогаш кога државата ќе повика.

„Не можеш да седиш дома кога гледаш како ти гори земјата, а знаеш дека можеш да помогнеш,“ скромно вели Стоје, кој ретко бара внимание, но секогаш е таму кога е најпотребно.

Иако не е личност од јавната сцена, туку е херој на небото, Стоје има и своја приватна страна – голем љубител е на македонската музика, особено на онаа со емоција, корени и душа. Вели дека низ музиката го пронаоѓа мирот што му е потребен по адреналинските летови. Негов верен придружник во секојдневието е Зона М1 радио, кое го следи со децении. Редовно ги слуша програмите, ја препознава секоја песна и често вели дека „музиката од Зона М1 е како продолжение на душата на Македонија“.

„Секое ден ми почнува со Зона М1. Таму ја има онаа вистинска, македонска енергија – без филтри, без вештачки ефекти. Само искрена музика и вистински чувства,“ раскажува Стоје со насмевка.

Во време кога пожртвуваноста е сè поретка, приказната за Стоје Арсовски потсетува дека хероите не секогаш носат униформи на сцена – понекогаш тие се луѓе што летаат низ чадот, со тивок глас, но големо срце.

Естрада.мк му посакува на нашиот избран херој за денеска, Стоје Арсовски да го служи здравјето и да биде во можност да излезе во пресрет на својот народ и држава доколку тоа е потребно.