Септември изобилува со културни, музички и забавни настани кои ветуваат незаборавни моменти за љубителите на уметноста, музиката, добрата забава но и креативноста. Естрада.мк ви издвојува неколку поразлични настани од естрадната култура, настани кои можеби ќе ве интересираат да ги посетите и да уживате во нешто поинакво од она на што сте навикнале. Во тој контекст ги издвојуваме.

АРТ УМ фестивал во Гевгелија

Во рамки на програмата „Гевгелија – Град на културата 2025“, на 19 и 20 септември ќе се одржи второто издание на АРТ УМ фестивалот, посветен на современата музичка и визуелна уметност. Настанот има за цел да ја збогати културната понуда на градот и регионот и да отвори нови хоризонти за младите уметници.

Концерт на Кики Лесендриќ и Пилоти

Истата вечер, на 19 септември, љубителите на рок музиката ќе имаат можност да уживаат во хитови на Кики Лесендриќ и Пилоти, на концерт во Public Room – Скопје.

Микрофестивал „Бостание“

На 20 септември, со почеток од 14 часот, во Зелената арка ќе се одржи микрофестивалот Бостание. На сцената ќе настапат Ishjan Twin, Eyes of Wonder, Чалгија Sound System, Јордан Костов квинтет и Vico – StereoHemia Records.

Добра Вода слави 25 години

Исто така во сабота, на 20 септември, Добра Вода организира голема роденденска забава на отворено. Посетителите ги очекуваат активности, игри и награди, а за музичкиот дел се задолжени The Dd’s, Ермилова и легендарните Pop Art Band.

Филмска програма „ЕкоКадар“

Од 19 до 24 септември ќе се прикажува филмската програма „ЕкоКадар: Малите гласови за големата природа“. Публиката ќе може да ги погледне култните документарци:

• 19 септември – Охридска пастрмка (1962, Кочо Нетков)
• 20 септември – Птици и риби (1961, Трајче Попов)
• 23 септември – Рибарството во Катлановско Езеро (1964, Вера Кличкова)
• 24 септември – Дојранско Езеро (1961, Трајче Попов)

VM Classic Rally – Западно рели на олдтајмери

На 20 септември, од 7 до 21 часот, ќе се одржи VM Classic Rally – WEST, државно првенство во авто–мото рели со историски возила. Настан што привлекува колекционери и љубители на автомобилизам од целата земја.

„Есенска магија“ во Македонско село

На 21 септември, посетителите ќе можат да уживаат во Есенска магија – креативна работилница во Македонско село, посветена на создавање рачно изработени есенски декорации.

Ретро вечер со Битолскиот камерен оркестар

На 26 септември во НУ Центар за култура „Марко Цепенков“ – Прилеп ќе се одржи концерт посветен на најпознатите MTV хитови од ’80-тите и ’90-тите години, во уникатен аранжман на Битолскиот камерен оркестар. Настан кој ветува вистинска носталгична музичка вечер.

Фестивал на креативни вештини

Од 25 до 28 септември, во Акантус – дом на уметноста и естетиката, ќе се одржува Фестивал на креативни вештини, кој ќе ги собере најиновативните уметници и занаетчии на едно место.

Скопје Винил Конвенција

За крај на месецот, на 27 септември, љубителите на грамофонски плочи ќе ја имаат својата омилена дестинација – Скопје Винил Конвенција, која по деветти пат ќе се одржи на платото на Музејот на Македонија и Куршумли ан. Настанот ќе понуди повеќе од 30 продавачи, над 30 диџеи, Food Court, Second Hand продавници и богата дванаесетчасовна програма.

👉 Септември е месец што ги спојува културата, уметноста и забавата. Без разлика дали сакате филм, музика, рачно изработени предмети, автомобилизам или журки на отворено – програмата низ Македонија нуди по нешто за сите.