Минатата година за македонската оперска уметност и традиционалната песна ќе остане впишана со златни букви преку јубилејот на мецосопранот Лени Партикова, магистер по оперско пеење и артист со две децении активна кариера, Партикова во 2024 година го прослави јубилејот 20 години кариера со голем солистички концерт во Националната опера и балет во Скопје, потсетувајќи ја публиката на силата на автентичниот вокал и на важноста на сопствениот јазик како носител на културен идентитет.

Истата година таа влезе во историјата на Драгачевскиот сабор на трубачи во Гуча, еден од најпрепознатливите фестивали во регионот, и во него Лени како прв и единствен уметник од Македонија што настапил на свој јазик. На 63-ото издание на саборот, нејзиниот настап беше збогатен со соработката со КУД „Св. Сава“ од Тетово, што внесе уште подлабока културна симбиоза меѓу песната и играта. Мостот кон оваа соработка е сопругот на Лени, Жарко Ѓорѓески, кој долги години е активен во играорните друштва и со своето искуство отвора пат за заеднички настапи. За учеството во Гуча, тие добија и посебна благодарница, признание што ја потврди важноста на нивниот заеднички придонес.

Ова искуство ја постави Партикова во улога не само на интерпретатор, туку и на културен амбасадор кој успева да ја обедини музиката и танцот во заедничка приказна.

Токму оваа година, Лени Партикова ја зацврсти својата улога како културен амбасадор на Македонија. Таа беше првиот и единствен претставник од земјава поканет да учествува на 33-от избор на Косовка девојка во манастирот Грачаница во Косово и Метохија. На свеченоста, што ја обединува духовноста, историјата и современата уметничка изведба, Партикова настапи на свој мајчин јазик, внесувајќи македонска боја и топлина во ова значајно културно-духовно збиралиште.

Со длабока интерпретација таа ги отпеа безвременските бисери „Отвори ми бело ленче“ и „Јовано, јованке“. Овие песни, иако традиционално македонски, во нејзината интерпретација се претворија во универзален јазик на љубов, носталгија и заедништво. Настапот во Грачаница беше доживеан не само како концерт, туку и како симболичен чин, потсетување дека уметноста нема граници, а јазикот на музиката може да гради мостови таму каде што понекогаш политиката или историјата оставаат ѕидови.

„За мене, ова не беше само настап, туку и духовно доживување,“ изјави Партикова по свеченоста. „Да се пее на Видовден во Грачаница, и тоа на македонски јазик, значеше да се донесе дел од Македонија таму каде што се собираат луѓе од различни простори и традиции.“

Со својот пат и визија, Лени Партикова одамна не е само оперска пејачка. Таа е чувар на традицијата, глас на современата уметност и мост на културна поврзаност. Дваесетте години кариера што ги одбележа, се само доказ дека автентичноста и упорноста се секогаш препознаени и наградени.

Деновиве пред неа е уште едно предизвикувачко поглавје, на 27 август ќе настапи на Лешочкиот фолк фест со песната „Горда сум Македонка“ – нумера која веќе во самиот наслов носи силна порака и идентитетска гордост. Очекувањата се големи, а публиката со нетрпение го чека овој настап за кој многумина предвидуваат дека ќе донесе нов успех и нова страница во нејзината уметничка приказна.

Нејзиниот јубилеј не е крај на едно поглавје, туку почеток на ново – во кое македонската песна и понатаму ќе ја пренесува низ фестивалските сцени на Балканот и пошироко, секогаш со гордо истакнато потекло и љубов кон корените.