Пред повеќе од три децении, во една поинаква музичка ера, беше создаден единствениот LP проект на Петранка Костадинова, дело кое долго време тивко постоеше во архивите, далеку од очите на јавноста.

Денес, благодарение на современата технологија и љубовта кон традицијата, овој вреден музички запис конечно добива нов живот. Дигитализиран и звучно обновен, проектот повторно е достапен за публиката, носејќи ја со себе истата онаа емоција, но во ново, почисто руво.

Оваа иницијатива не доаѓа од институции, туку од најискреното место, семејството. Нејзините синови, водени од почит и гордост, решија да го зачуваат делото на својата мајка и да го направат достапно за идните генерации. Со тоа, музиката на Петранка повеќе не е само архивски материјал, туку живо сведоштво за едно време, еден глас и една традиција.

Реклама

Зад целиот проект стои Горан Алачки како продуцент, аранжер и хармоника. Во реализацијата учествува голем народен оркестар во состав Ристо Краповски на кларинет, Радослав Шутевски на тапани, Лилјана Автовска на флејта, Благоја Маротов на контрабас, Валентино Бенедети на гитара и Љупчо Каргов на мандолина.

Петранка Костадинова важи за една од многуте значајните и впечатливи фигури во македонската народна музика. Нејзиниот автентичен израз, препознатлив вокал и емоцијата што ја носеше во секоја изведба ја вбројуваат меѓу легендите кои оставиле неизбришлива трага. Зад себе остави низа антологиски песни како „Не кажувај либе добра ноќ“, „Во Струмица на улица“, „Мајсторе, мајсторе“, „А бре воденичаре“, „Заплакало е Мариово“, како и многу други кои и денес се слушаат со ист жар и почит.

Не смееме да дозволиме ваквите имиња да паднат во заборав. Токму тие се темелите врз кои е изградена македонската народна музика. Нивните песни не се само мелодии, тие се наш корен, наш идентитет и наш духовен код. Да ги зачуваме значи да се зачуваме себеси.

Реклама

Редакцијата на Естрада.мк ќе продолжи да создава вакви содржини, со цел да потсетува и да оддава почит на великаните кои ја обликувале македонската музичка сцена. Во наредните текстови ќе се осврнеме и на делото на други легенди чии гласови и песни засекогаш остануваат дел од нашата културна ризница.

Вистинската музика не старее.

Реклама