Ноќта во познат локал во Кавадарци заврши бурно, откако нешто по полноќ настапот на српскиот фолк-пејач Аца Лукас бил прекинат од полицијата. Според информациите што ги пренесуваат медиумите, пејачот бил симнат од сцената од страна на полициски службеници и спроведен во полициска станица, а на социјалните мрежи веќе кружат видеа на кои се гледа како Лукас го напушта локалот во придружба на полицијата.

Присутните сведочат дека настапот бил во полн ек и дека атмосферата била одлична до моментот кога полицијата интервенирала. Гостите останале во локалот во надеж дека пејачот ќе се врати, но по околу триесет минути преку разглас било соопштено дека настапот е завршен, бидејќи изведувачот е однесен во полициската станица.

Реклама

По инцидентот се огласи и менаџерот на Лукас, Саша Мирковиќ, кој на социјалните мрежи упати обвинувања дека приведувањето било политички мотивирано. Тој тврди дека интервенцијата била „по наредба“ на премиерот Христијан Мицкоски, но јавноста потсетува дека Мирковиќ е познат по контроверзни и недокажани изјави.

Од СВР Велес имаат поинакво објаснување. Портпаролката Биљана Ѓаковска изјави дека интервенцијата следела при спроведување акциска контрола на угостителски објекти.

Реклама

„Во угостителски објект во Кавадарци било констатирано дека А.В. настапувал без потребната дозвола“, истакна Ѓаковска.

Покрај тоа, инспекциските служби утврдиле и серија други прекршоци: неиздавање фискални сметки (констатирано од УЈП), кршење на Законот за пушење, присуство на поголем број гости од дозволениот капацитет (констатирано од Државниот пазарен инспекторат).

Реклама

За сите прекршоци ќе следуваат соодветни поднесоци. Пренатрупаноста на локалот повторно ја отвора чувствителната тема за безбедноста во угостителските објекти – особено по неодамнешната трагедија во Кочани, по која јавноста очекуваше построга контрола и поголема одговорност.

Дали сето ова ќе го доведе во прашање и оддржувањето на најавениот голем концерт на Аца Лукас на 20 декември во арената „Јане Сандански“ во Скопје останува да видиме. На овој концерт треба да му се придружат и Мира Шкориќ, Мирослав Илиќ, како и гости, изведувачите Жаре Бербер и Галама бенд.

Реклама