Во дворот на црквата „Св. Јован Крстител“ во с. Булачани, на 18 септември (четврток) со почеток од 18:30 часот, ќе се одржи голем хуманитарен концерт под наслов „Во ритам на хуманоста“. Настанот има единствена цел – преку музика, забава и заедништво да се соберат хуманитарни средства и да се испрати порака на љубов и поддршка.

Концертот е јавен и отворен за сите граѓани, а организаторите најавуваат вечер исполнета со богата музичка програма и добра забава. На сцената ќе настапат големи музички имиња: Влатко Миладиновски, Никола Станишиќ, Дамјан Стојановски, Елена Андоновска, Благоја Грујовски, Методија Столески, MIYATTA, Василија Петрова, Сања Здјелар, како и групите Екстра Бенд, Енигма Бенд, Ќустек зурли и тапани, ФА „Седенка“ и ВИС „Аманет“.

Посетителите ќе имаат можност да уживаат не само во разновидната музика, туку и во добра скара и вистинска народна атмосфера. Организаторот Симона Велковска најави дека концертот ќе биде соодветно обезбеден за сите посетители да се чувствуваат безбедно и пријатно.

„Да се обединиме заедно и да покажеме дека срцето најубаво чука – во ритамот на хуманоста!“, порачуваат организаторите, најавувајќи дека наскоро ќе биде објавен и официјалниот репертоар на вечерта.