На македонската музичка сцена се раѓа една нова, искрена и силно емотивна приказна, создадена од две млади личности кои ги спојува нешто многу поголемо од музиката, а тоа е љубовта кон Македонија и љубовта кон песната.

Димче Ѓорѓиовски, момчето кое стои зад препознатливиот профил „Горд Македонец“, за кого Естрада.мк веќе пишуваше, одамна не е само интернет лик. Тој стана симбол на млад човек кој со огромна страст ја промовира Македонија, нејзините традиции, песна, музика и корени. Во време кога многумина забораваат од каде потекнуваат, Димче со секоја своја објава потсетува дека македонскиот дух сè уште живее силно.

Од другата страна е младата и исклучително талентирана Стефанија Костадинова, девојка која има само 16 години, но зад себе веќе носи сериозна музичка приказна. Нејзината љубов кон музиката започнала уште на тригодишна возраст, а уште како дете чувствувала дека песната е нејзиниот животен пат. На само 12 години почнува да објавува видеа на социјалните мрежи, а токму таму нејзиниот талент почнува да привлекува внимание. Следуваат настапи на регионални и државни натпревари по соло пеење, каде што освојува бројни први места и признанија.

Реклама

Големиот пресврт доаѓа во 2024 година, кога Стефанија учествува на „Македонско Талент Шоу“. Иако имала само 14 години, успева да победи и како награда ја добива својата прва авторска песна – „Заспана убавица“. Потоа настапува и на Art In Festival, каде што освојува фантастични 99 поени и прва награда, а нејзиниот талент ја носи и на престижното музичко натпреварување Hype Zvezde, каде што како најмлада натпреварувачка на само 16 години се пласира меѓу топ 20 финалистите.

И токму тука започнува приказната која деновиве привлекува огромно внимание. Димче и Стефанија ги спои нивниот нов дует „Летај соколе“, песна која носи силна емоција и порака што ќе ја почувствува секој Македонец, без разлика дали живее дома или далеку од татковината. Текстот е дело на Димче Ѓорѓиовски, музиката ја создава тој со делумна помош на AI технологија, додека видеоспотот е реализиран во соработка со Дејан Горгиев и Balkan Music TV. Мизиката е снимена во Д1 студио кај Јован Василевски од Тетово кој што направи Master&voc recording на песната. Димче исто така упатува благодарност до неговите помагатели ,,Македонско катче” од Скопје, до сите оние кои им помогнаа околу костимите и македонските народни носии, а тоа се: Дом на Култура ..Илинден” Демир Хисар, Академија “Еуроарт” и Ансамбл “Јанко Глигоров” Свети Николе.

Песната зборува за туѓината, разделбата, копнежот по родниот крај и судбината на Македонецот кој често мора да замине далеку, но никогаш не ја заборава својата земја. Во неа се испреплетуваат младешката енергија, патриотската емоција и современиот музички пристап, што ја прави уште поинтересна за публиката.

Реклама

Стефанија не ја крие својата благодарност за оваа соработка и со искрени зборови вели: „Сакам да упатам едно огромно благодарам до човекот кој успеа да ме претстави како бисер пред македонскиот народ и човекот кој ми ја пружа најголемата поддршка, а тоа е Димче Ѓорѓиовски, уште познат како Горд Македонец. Баш ми е мило што го запознав и што ми ја пружи шансата да направиме македонски дует ‘Летај соколе’. Пресреќна сум. А во иднина ве очекуваат и нови соработки со него, односно нови проекти.“

Овие зборови јасно покажуваат дека меѓу нив не се раѓа само музичка соработка, туку и силна уметничка и човечка поддршка. Не е случајно што промоцијата на „Летај соколе“ е закажана за 2 август, ден со огромно историско и емоционално значење за македонскиот народ. Многумина веќе ја очекуваат песната како вистинска патриотска и емотивна музичка приказна која може да допре до срцата на Македонците ширум светот.

Реклама

Стефанија испрати и искрена порака до своите поддржувачи: „Сакам јавно на сите да се заблагодарам за целата поддршка што ми ја пружате. Започнав од нула, а сега стигнав до 4700 следачи на Инстаграм. Ве сакам!“

Токму оваа скромност, искреност и благодарност ја прават уште поблиска до публиката. Во време кога младите често се губат во трендови без вредност, Димче Ѓорѓиовски и Стефанија Костадинова испраќаат поинаква порака, дека македонската песна, традиција и емоција сè уште имаат иднина.

Реклама

Останува на 2 август да ја слушнеме „Летај соколе“ и да видиме дали оваа песна ќе стане новиот глас на младата генерација која сака да ја носи Македонија во срцето, каде и да се наоѓа. 🇲🇰🎶

Реклама