Народна

Песните од Егејот – тивкиот отпор што го чува македонскиот идентитет

Објавено

пред 5 месеци

на

април 8, 2026

Од

Музиката отсекогаш била многу повеќе од уметност, таа е сведоштво, емоција и чувар на корените. Во таа насока, Естрада.мк продолжува да потсетува дека токму преку песната, македонскиот народ успеал да го сочува својот идентитет и во најтешките времиња.

Овој пат се навраќаме на песните од егејскиот дел на Македонија, песни кои не се само мелодија, туку и симбол на отпор, болка и непокор.

Во минатото, за многу Македонци од Егејска Македонија, пеењето на македонски песни не било дозволено. Според сведоштвата што се пренесуваат од генерација на генерација, тие што биле фатени како пеат на својот мајчин јазик, без разлика дали јавно или во приватност, биле строго казнувани. Во такви услови, песната не исчезнала, туку станала потивка, но уште посилна.

Македонските песни се пееле кришум, во домовите, по полињата, на пат, тивко, со страв некој да не ги чуе. Но и покрај тоа, тие опстанале. Се пренесувале од уста на уста, од срце на срце, станувајќи дел од колективната меморија на народот.

Меѓу тие песни што го преживеале времето и забраните се „Твојте очи, Лено мори“, „Излегу да се расшета“, „Ој јаворе, јаворе“, „Мори чупи Костурчанки“, „Киниса да ода В’бел на гости“ и многу, многу други. Во нив се вплетени љубовта, тагата, носталгијата и копнежот по родниот крај, чувства кои не можеле да бидат замолчени.

Денес, овие песни се слободно пеени и прифатени како дел од македонското музичко богатство. Она што некогаш било шепот, денес е гласно изразена традиција. Но нивната вистинска вредност лежи токму во тоа што успеале да опстанат и покрај обидите да бидат избришани.

Зачувувањето на овие песни не е само прашање на музика, туку и на идентитет. Тие се жив доказ за истрајноста на еден народ, за неговата врска со корените и за силата на културата која не може да биде забранета.

Затоа, секоја испеана строфа од овие песни денес не е само уживање, туку и почит кон минатото бидејќи, чувајќи ги песните од заборав, ги чуваме и сопствените корени.

Поврзани теми:

Следно

Васка Илиева – гласот што ја претвори македонската песна во идентитет

Не пропуштајте

Младата Викторија Ефтимова го претстави новиот сингл „Идеали“

Продолжи со читање

Народна

„Тумба фест 2026“ – кумановскиот хумор повторно ќе се пее на сцена

Објавено

пред 3 дена

на

август 23, 2026

Од

Цаци

Куманово и годинава ќе биде домаќин на една од најспецифичните фестивалски приказни на македонската естрадна сцена. На 24 август, со почеток во 20 часот, во рамките на „Кумановско културно лето“ ќе се одржи 14-тото издание на „Тумба фест“, фестивал кој низ годините изгради препознатлив стил спојувајќи ја народната песна со хуморот, сатирата и секојдневието.

Зад фестивалот стои здружението „Етно ризница“, предводено од Драган Јаким, а токму негувањето на кумановскиот дијалект, локалниот хумор и македонскиот народен дух се едни од главните обележја по кои „Тумба фест“ се разликува од останатите фестивалски манифестации.

И оваа година публиката ќе има можност да слушне 15 нови композиции, создадени од познати македонски автори. Меѓу имињата кои учествуваат во музичкиот дел се Томислав Коцевски – Пепси, Цане Петров, Горан Милошески, Младен Протиќ,Боби Петковски, Славко Ристески, Кирил Стојчевски, Љубиша Јовановски – Жишка и Слаѓан Станишковски.

Посебноста на песните е токму во нивната тема, наместо класични фестивалски љубовни приказни, „Тумба фест“ и понатаму се потпира на духовитоста, иронијата и препознатливите ситуации од секојдневниот живот, преточени во музика.

На сцената ќе се појават голем број познати имиња. Публиката ќе ги види Катерина Брезева и „Соната“, Бранимир Стошиќ – Каце, Круме Спасовски и актерот Владо Дојчиновски, Вукица Челебиева и групата „Савршен дан“, Нино Величковски, Борче Наумовски – Министерот, Катерина Николовска Мицанова, Боби Амадеус и Татјана Јовановска, Мишко Микеле Србиновски, Ташко Карафиловски со „Астра бенд“, Јованка Јо, Виктор Димитриевски, Матео Шваст, Кире Науновски.

Како специјална гостинка на фестивалската вечер ќе настапи Ленче Кукиќ, додека водителската улога годинава повторно ѝ е доверена на Сузана Апостолова.

„Тумба фест“ не е само фестивал на нови песни. И годинава ќе бидат доделени традиционалните фестивалски признанија, меѓу кои и наградата за животно дело, чиј добитник организаторите сè уште го чуваат како изненадување.

Познато е, пак, дека признанието за најслушана песна меѓу две фестивалски изданија годинава ќе му припадне на Раде Младеновски за песната „Ракија“, дело на авторот Ристо Самарџиев.

Фестивалот традиционално се одржува под покровителство на Општина Куманово, а годинава неговата порака и специфичниот хумористичен пристап треба да стигнат до уште поширока публика. Генерален медиумски покровител на 14-тото издание е Македонската радио-телевизија.

На 24 август, Куманово повторно ќе покаже дека народната песна не мора секогаш да биде само сериозна и емотивна, понекогаш најдобро се пее токму она што сите го живееме, но со малку повеќе хумор, иронија и добронамерен мајтап.

Продолжи со читање