Пред неколку месеци, на социјалните мрежи се појави едно младо име кое брзо го привлече вниманието на јавноста – Димче Ѓорѓиовски, на социјалните мрежи познат како ,,Горд Македонец”. Млад, искрен и исполнет со ентузијазам и длабок патриотизам, Димче несебично ја промовира Македонија и македонската музика, користејќи ги можностите на современата технологија. Секојдневно создава текстови и, со помош на AI програми, комплетни песни придружени со видеа, носејќи силни пораки за идентитетот, историјата и духот на македонскиот народ.

Во неговите почетоци се роди песната „Непокорни Македонци“ – дело кое за кратко време ги освои неговите следбеници и предизвика силни емоции кај публиката. Но нејзината моќ и квалитет не останаа забележани само на социјалните мрежи. Песната го привлече вниманието и на познатиот пејач Владимир Поповски, кој ги откупи авторските права и ѝ даде нов, сценски живот.

„Непокорни Македонци“ во изведба на Владимир Поповски доби силна музичка поддршка од врвни музичари: Дино Милосављевиќ на тапани, Горан Гешовски на бас гитара, Нико Сребров на пијано и Танче Гроздановски на гитара. За песната е снимен и впечатлив видео спот во продукција на Студио Анастасија, кој дополнително ја заокружува нејзината порака.

На својот Фејсбук профил, Владимир Поповски емотивно напиша дека ова е неговата прва авторска композиција и дека со неа ја отвора приказната за еден народ што со векови носи тешки бремиња, поделби, неправди, прогонства и тишини но никогаш не се откажал од себе и од своето достоинство.

„Непокорни Македонци“, како што истакнува Поповски, не е само песна, туку глас на оние што не влегле во учебниците, на оние што тивко ја чувале земјата, на сите што биле разделени со линии на карта и казнувани само затоа што биле Македонци. Песна за пирејот што не се суши, за гордоста што не исчезнува и за љубовта кон Македонија која обединува дури и кога сè друго се руши.

Особено значаен момент е и фактот што, во преписката со екипата на Естрада.мк околу авторските права, Владимир Поповски нагласи:
„Небитно е, оваа песна е на македонскиот народ.“

Видео спотот е делумно снимен и со екипата на ЕБР (Единица за брзо распоредување), со што симболично и достоинствено им се оддава чест на загинатите припадници на оваа единица, момци кои ги положиле своите животи во служба на татковината.

„Непокорни Македонци“ денес стои како музички споменик и почит кон сите непокорни души, кон сите што издржаа, опстанаа и продолжуваат со крената глава. Потсетник дека можат да нè делат, да нè бришат и да нè потиснуваат, но никогаш да ни ја земат душата. Затоа што Македонија живее преку своите луѓе и преку песни како оваа.