Шоу Биз

25 години музика во една вечер – „Љубојна“ со јубилеен концерт во Скопје

Објавено

пред 5 месеци

на

март 16, 2026

Од

Цаци

Една од најпрепознатливите и најавтентични македонски музички групи, Љубојна, годинава одбележува значаен јубилеј – 25 години од своето постоење. По тој повод, бендот ја започнува 2026 година со голем целовечерен концерт во Скопје, со кој ќе прослави четврт век музичко творештво.

Јубилејниот концерт ќе се одржи на 29 март со почеток во 20 часот во Големата сала на Македонска филхармонија, каде публиката ќе има можност да ужива во богатата музичка приказна која „Љубојна“ ја создава веќе две и пол децении.

Во текот на годините, „Љубојна“ се изгради многу повеќе од музички состав, таа стана препознатлив културен феномен, кој со својот уникатен пристап, успеа да ѝ даде нов живот на традиционалната музика, претворајќи ја во модерен и космополитски звук што лесно комуницира со публиката.

Препознатливиот звук на групата се создава преку спојот на различни музички стилови од фолк и џез, до поп, фанк и соул, збогатени со ориентални и етно елементи. Нивните настапи се познати по силната сценска енергија и страстната изведба, која често потсетува на енергијата на рок-бенд.

Централна фигура во музичката приказна на „Љубојна“ е вокалистката Вера Милошевска, чиј впечатлив вокал со години ја носи емоционалната тежина на нивните песни. Заедно со контрабасистот, композитор и продуцент Оливер Јосифовски, таа претставува столб на бендот и еден од главните двигатели на неговиот препознатлив стил.

На концертот во Скопје публиката ќе има можност да слушне дел од најзначајните композиции од нивната кариера, изведени во автентичниот стил по кој бендот е познат. Настанот ветува вечер исполнета со силни емоции, богата музичка атмосфера и посебен сценски набој, а организаторите најавуваат и специјални гости чии имиња ќе бидат објавени наскоро.

Влезниците за концертот веќе се пуштени во продажба и можат да се набават онлајн и преку продажната мрежа на Мк Тикетс.

Со овој концерт „Љубојна“ ќе го заокружи своето 25-годишното музичко патување, потврдувајќи уште еднаш дека нивната музика останува мост помеѓу традицијата и современиот звук.

Поврзани теми:

Следно

ЈАКОВ ЈОЗИНОВИЌ ДОАЃА ВО СКОПЈЕ – РЕГИОНАЛНАТА СЕНЗАЦИЈА СО ПРВ КОНЦЕРТ ВО МАКЕДОНИЈА

Не пропуштајте

Сека Алексиќ и Раста на иста сцена во Арена „Јане Сандански“

Продолжи со читање

Шоу Биз

Сузана Манчиќ доаѓа на „Охрид Фест“ – Во Охрид ќе прослави 50 години кариера

Објавено

пред 1 ден

на

август 6, 2026

Од

Цаци

Една од најпрепознатливите дами на балканската естрада, Сузана Манчиќ, годинава ќе биде специјална гостинка на 33. издание на Интернационалниот музички фестивал „Охрид Фест – Охридски трубадури“. Таа ќе настапи на Интернационалната фестивалска вечер, носејќи ја на охридската сцена својата препознатлива харизма, шарм и позитивна енергија.

Нејзиното гостување во Охрид ќе има и посебна симболика. Токму на сцената на „Охрид Фест“, Сузана Манчиќ ќе одбележи импресивни 50 години од својата богата и успешна кариера – пет децении исполнети со музика, телевизија, актерство и незаборавни моменти поради кои со години важи за една од најпознатите и најомилените јавни личности на просторите на поранешна Југославија.

Во разговор по повод нејзиното доаѓање во Македонија, Манчиќ откри дека иако многупати гостувала во земјава, ова ќе биде нејзин прв настап на „Охрид Фест“.

„Безброј пати сум била во Македонија, но за првпат доаѓам на ‘Охрид Фест’ и навистина сум многу среќна поради тоа. Ќе ја изведам дуетската песна со Ѓоле Боем, дело на композиторот Григор Копров. Песната веќе ја снимивме, а мојот колега постојано ме прашува дали ја вежбам. Не знае со кого си има работа – кога еднаш ќе научам нешто, тоа останува научено“, вели Сузана низ смеа.

Охрид за неа не е непозната дестинација. Напротив, како што раскажува, со градот ја врзуваат бројни спомени – од училишни екскурзии, преку настапи и концерти, па сè до летување со нејзините ќерки додека биле мали.

„Во Охрид сум била безброј пати. Моите ќерки и денес се сеќаваат на зборовите ‘благодарам’ и ‘како се викаш?’, кои тогаш ги научија и со насмевка ги изговараат“, открива таа.

Кога зборува за својата долга кариера, Манчиќ признава дека спомените се толку многубројни што решила да ги преточи во две автобиографски книги.

„Имам навистина многу спомени и тие траат цел живот. Во книгите ги собрав најинтересните приказни од мојот живот и кариерата. За жал, сè уште не се преведени на македонски јазик“, вели таа.

Публиката на „Охрид Фест“ од неа може да очекува, пред сè, добра песна и добро расположение.

„Добрата песна е добра песна. Единственото изненадување може да биде само тоа што ќе го облечам. Очекувам средби со нови и стари колеги, мало возење по езерото и еден блескав охридски бисер“, додава Сузана.

Осврнувајќи се на денешната музичка сцена, таа има јасна порака за младите изведувачи: „Упорност. И само упорност. Популарноста е расиплива стока – денес сте ѕвезда, утре ве нема никаде. Затоа се потребни памет, внимателен избор на песни и соработници, професионалност и постојана работа на себе.“

Но ова лето за Сузана Манчиќ е посебно и поради уште една причина. Само пред неколку дена таа за првпат стана баба, а емоциите околу доаѓањето на внучето не ги крие.

„Имав огромна трема, поголема отколку кога јас се породив. Утрото ми јавија дека сè поминало добро и дека и бебето и мајката се во добра состојба. Тоа беше чувство на неизмерна среќа и гордост. Мојата Теодора стана мајка“, раскажува таа емотивно.

Особено ја трогнало тоа што нејзината помлада ќерка Наталија присуствувала на породувањето и цело време ја бодрела својата сестра.

„Сè уште не сум целосно свесна за промените што допрва следуваат. Кај мене тие доаѓаат како некоја втора, одложена реакција“, искрено признава Сузана.

На прашањето што би сакала еден ден нејзиниот внук да знае за неа, таа одговара со препознатливата ведрина:

„Ќе знае дека неговата баба била убава, весела и успешна жена, која оставила свој белег.“

И за крај, Сузана Манчиќ испрати топла порака до македонската публика и до сите љубители на „Охрид Фест“.

„Се надевам дека македонската публика не ме заборавила, а ако ме заборавила, ќе имаме можност повторно да се запознаеме. Голем поздрав до сите! Со нетрпение чекам да се видиме и заедно да запееме!“

Со ваква искреност, шарм и животна енергија, настапот на Сузана Манчиќ несомнено ќе биде еден од најемотивните и највпечатливите моменти на годинашното издание на „Охрид Фест – Охридски трубадури“.

Продолжи со читање